(UPDATE) Maestra nga nadakpan sa buy bust operation sa Arevalo, napasakaan na sang kaso
By: Aine Grace Bravo | July 19, 2019
via Aksyon Aljohn Torreta
Iloilo City — Ginpasakaan sang kaso ang 45-anyos nga maestra nga nadakpan sa buy bust operation sa Barangay Sta. Cruz, Arevalo sang Hulyo 17 sang gab-i.
Suno kay Police Major Marlon Valencia, hepe sang Mandurriao Police Station, kaso nga paglapas sa Comprehensive Dangerous Drugs Act ang ginpasaka kay Jonaseth Aguirre.
Preso si Aguirre sa Mandurriao Police Station.
Una na ginpahayag ni PDEA 6 Director Alex Tablate nga negatibo ang resulta sang drug test sa subject, apang napamatud-an sa laboratory test nga shabu ang nakuha sa iya nga 11 ka sachets.
‘GINPLASTAR NILA SA LAMESA’
Nanindugan si Aguirre nga indi iya ang na-recover nga mga sachets sang shabu.
Dugang niya,nakita niya nga ginplastar sang operatiba ang items kag kwarta sa ibabaw sang ila lamesa.
Ginpabutyag man sang subject nga ginpilit sang naka-maskara nga mga operatiba nga magsulod sa ila balay kag wala man nagpakilala sa pag-conduct sang operation.
Una na nga nadakpan ang live-in partner sang subject angut man sa illegal drug trade.