(UPDATE) Mag-utod nga mangingisda sa Tigbauan nga napadpad sa Palawan, nakapauli na

Tigbauan, Iloilo–Nagpasalig ang Local Government Unit sang Tigbauan kag iban pa nga ahensiya sang gobyerno nga mahatag sang bulig sa mag-utod nga mangingisda nga ginreport missing sang Disyembre 30 matapos na-aberya sa tunga sang lawod kag napadpad sa Palawan.

Suno kay Mr. Rexfel Trivilegio, Municipal Disaster and Risk Reduction Management Officer sa Tigbauan, hatagan sanday Reyland Fernandez, 24-anyos, kag Reynilo Fernandez, 23-anyos, sang Brgy. Baguingin, Tigbauan sang small livelihood nga programa sang banwa sa mga mangingisda. Ginpahayag man ni Tigbauan Mayor Suzette Alquisada nga mahatag ang LGU sang makina sa sakayan pandagat sa mga Fernandez.

Nagpasalig naman ang Red Cross nga mahatag sang bag-o nga pump boat sa mag-utod kag may financial assistance man halin sa Department of Social Welfare and Development.

Nag-abot kaina sang aga ang mag-utod sa Iloilo Airport halin sa Palawan sa diin sila narescue.

Tuman ang kalipay sang iloy sang mag-utod nga si Mrs. Nilos Fernandez nga nakapauli na ang duha. Ginakabig sini nga milagro nga nakaluwas ang duha bisan walo ka adlaw sila nga nagpa-utaw-utaw sa lawod. (AGB)