UPDATE: Mga pusil sang kontrobersyal nga negosyante nga si Melvin Odicta alyas Boyet, makabig na nga loose firearms suno kay PRO-6 Director PCSUPT Bernardo Diaz

Iloilo City–Mapilitan ang mga police nga magpasaka sang kaso batok kay PDEA-identified top drug personality Melvin Odicta alyas Boyet kun indi sini pag-isurrender ang mga ginahuptan nga pusil.

Ini makaligad man nagpagguwa sang resolution ang Firearms and Explosives Office-License Revocation and Restoration Board (FLRRB) nga naga-revoke sang License to Own and Possess Firearm (LTOPF) ni Odicta. Suno kay Police Regional Office 6 Director PCSUPT Bernardo Diaz, makabig na nga loose firearms ang mga pusil ni Odicta. Nagpaandam man si Diaz batok sa pagbaligya sang pusil nga na-revoke na ang lisensiya. Suno sa iya, puwede kasuhan sang illegal transfer of firearm ang nagbaligya sang amo nga pusil samtang ang nagbakal naman mahimo kasuhan sang illegal possession of firearm.

Kahapon, ginpadulungan na sang Iloilo City Police Office ang balay ni Odicta paagi sa ginatawag nga Oplan Katok agud pahibaluon ini nga na-revoke na ang iya lisensiya sa pagpanag-iya kag paghupot sang pusil.

Sa resolution sang FLRRB, ginpahayag nga gin-revoke ang lisensiya ni Odicta bangud na-convict ini sa kaso may kaangtanan sa illegal drugs sang 1989. (Aine Grace Bravo)