Video sang Pagwaldati sang Jeepney driver sa Babaye nga pasahero matapos Ginmuno nga Wala naglakat ang iya Salakayan bisan Greenlight na, Naglapta sa Social Media

Iloilo City — Naglapta sa social media ang video sang pagwangal sang driver sang Leganes-SM Highway nga jeep matapos ginmunuhan sang babaye nga pasahero kun ngaa wala pa ini naglakat bisan nag-greenlight na.

Natabu ang pagwaldati sang Driver sang jeep nga may plate number FVW 735 sa stoplight sa Infante Flyover samtang pabalik ang salakyan sa Leganes pasado las 11 sang aga kahapon.

Nagpondo ang jeep bangud naka-red light pero sang nag-greenlight na wala pa ini nagdiretso kag nagpahinay-hinay para maabtan sang iban pa nga pasahero tubtob naabtan liwat sang red light.

Sang ginpamangkot sang babaye nga pasahero sa front seat, dire na kag naakig ang driver.

Gilayon naman nga gin-aksyunan sang LTFRB 6 ang naglapta nga video.

Gin-verify ni Atty. Joemarie Lamparero, Legal Officer kag Spokesperson sang LTFRB 6 ang records sang jeep nga may plate number FVW 735 kabangdanan nakilala ang operator sini.

Mismo si Lamparero ang nagtawag sa operator nga si Lolita Soncio kag gin-istorya ini sa natabu.

Ginpakilala man suno kay Lamparero sang operator ang driver sini nga si Clemente Flores sang Balantang, Jaro.

Gindala man sang operator ang driver sini sa LTFRB Office para magpa-athag sang ila bahin sa naglapta nga video.

Una na ginpahanumdom ni Lamparero nga may salabton ang mga driver nga nagapakita sang ka-arogante sa mga pasahero. (JoMaque)