Water supply sang MIWD, nabuhinan bangud sang El Niño

Iloilo City–Nabuhinan sang 11 thousand cubic meters ang supply sang Metro Iloilo Water District ukon MIWD kada adlaw bangud sang El Niño.

Pa-athag ni MIWD General Manager Imelda Magsuci, nahimo na lang nga 45 thousand cubic meters ang supply nila kada adlaw. Nagasakup na ini sa tanan nga ginasupplayan sang MIWD suno kay Magsuci.

Ginpahayag naman ni Magsuci nga apektado gid man ang syudad kon may problema sa supply bangud end point na ini ukon pinakapunta nga ginasuplayan sang MIWD. Gindeklarar sang Martes sang City Council ang state of water calamity sa syudad kasunod sang report nga apektado ang supply sang potable water sa Lanit, Buntatala, Bitoon kag San Isidro sa Jaro kag San Juan, Boulevard kag Calumpang sa Molo.

‘Conserve’

Gin-engganyo ni GM Magsuci ang mga konsumedor nga magkinot sa tubig.

Suno kay Magsuci, dapat indi pag-usikan ang tubig agud makatilaw man ang iban. May mga nakalinya naman nga solusyon ang MIWD agud madugangan ang ila supply sa mga konsumedor. (Aine Grace Bravo)