MORE Electric and Power Corporation, nagalaum nga pirmahan ni Presidente Duterte ang ila franchise sa power distribution

Iloilo City (UPDATE) – Wala gina-kwestyun sang MORE Electric and Power Corporation ang padayon nga pag-operate sang Panay Electric Company (PECO) bisan expired na ang ila franchise sugod subong nga adlaw, Enero 19.

Suno kay MORE President Rowell Castro, may pahanugot man sang Department of Energy ang operasyon sang PECO kag wala pa man sila sang franchise agud mangin bag-o nga power distributor sa syudad.

Nagalaum naman si Castro nga mapirmahan na ni Presidente Rodrigo Duterte ang franchise bill nga gin-aprubahan sang Kongreso agud maka-operate sila sa Iloilo City. Kon mangin laye na ang bill, nagalaum man ang MORE nga mangin bukas ang PECO sa negosasyon ‘para sa kaayuhan sang mga konsumedor.’

Samtang wala pa mapirmahan ang franchise, sige-sige ang preparasyon sang MORE suno pa kay Castro. (JoMaque)