Pavia Mayor Luigi Gorriceta, mahatag sang P100K sa makahatag sang impormasyon angut sa pagpatay sa 22-anyos nga babaye sa Pavia

By: JoMaque | July 18, 2019, 9:30am

Pavia, Iloilo – Mahatag sang P100,000 nga reward si Mayor Luigi Gorriceta sa sin-o man nga makahatag sang impormasyon agud makilala ang suspect sa pagpatay sa 22 anyos nga dalaga nga nasapwan sa sulod sang iya kuwarto nga may mga pilas sa ulo kag wala na sang underwear sa Barangay Purok 4 kahapon sang kaagahon.

Suno kay Mayor Gorriceta, mahalin sa intelligence fund sang munisipyo ang reward mga iya ihatag.

Mahimo suno sa iya magkadto sa Pavia Police Station ang sin-o man nga may nahibal-an angut sa krimen para maghatag sang iya statement.

Ginpasiguro man ni Gorriceta nga taguon ang identity sang makahatag sang impormasyon para sa iya seguridad.

Luyag sang alkalde nga madakop ang may kahimuan sa pagpatay kay Eira Jane Fabiaña nga Assistant Manager sang Jollibee sa GT Town Center Plaza Pavia.