UR SURE DIVISION-Passi sa San Enrique, nag-discharge sang ila expired nga kalamay sa suba — EMB 6
Iloilo City — Nag-discharge ang Universal Robina-Sugar and Renewables Division (Passi) sang ila expired nga kalamay (liquid/ organic matter) sa Asisig Creek sa San Enrique, Iloilo.
Ini ang pahayag ni Engr. Ronald Limua, Officer-in-Charge sang Environmental Management Bureau ukon EMB 6, kasunod sang ila technical conference subong nga adlaw, Abril 17, sa mga representante sang UR-SURE, South Balibago Resources Inc., Community Environmental and Natural Resources Office, Provincial Environment and Natural Resources Office kag barangay officials sang Imbang Pequeño, San Enrique nga ginapahamtangan sang facility.
Suno kay Engr. Limua, may apat ka mga drainage ang UR-SURE nga ginabuswangan sang liquid nga expired nga kalamay sa Asisig Creek.
Ginpahayag na-contaminate ang unod sang spray pond sang nasambit nga kumpaniya bangud naguba ang porsyon sang tubo nga nagasaylo sa expired nga kalamay.
Nag-awas naman ang unod sang spray pond kag nagderetso sa drainage canal tubtob nga nagbuswang sa Asisig Creek nga nagakonekta sa Jalaur River, ang ginakuhaan sang tubig sang South Balibago.
‘MADUGAY NA NGA NA-MONITOR’
Madugay na sang na-monitor sang EMB 6 nga nag-awas ang spray pond sang UR-SURE.
Suno kay Engr. Limua, Enero subong nga tuig sang ginmanduan nila ang UR-SURE nga butangan sang mga sand bags ang palibot sang spray pond.
Dugang niya, gintapalan man sang tagdumalahan sang UR-SURE ang mga leakage sa ila pipes.
Marso sang nakabaton sang reklamo ang EMB 6 halin sa South Balibago Resources Inc. bangud nag-brownish kag baho bagaso ang tubig nga nakuha nila sa Jalaur River.
‘DELIKADO’
Bisan contaminated na ang nagasimbog sa suba, indi ini delikado suno kay Engr. Limua bangud organic ang materyal kag nagakatunaw man ini sa pag-ilig sang tubig sa suba.
Makabig naman delikado kag makahalit kun tuman na ka damo sang organic matter nga nag-impon sa tubig sa suba.
Nagataas sang biochemical oxygen demand sa lugar suno kay Engr. Limua nga posible naman tunaan sang fish kill.
Class C ukon mahimo lang magamit sa irigasyon kag agrikultura ang tubig sa Asisig Creek kag Jalaur River suno kay Engr. Limua.
Dugang niya,7 mg/liter sang biochemical oxygen ang demand sa amo nga classification.
Nadiskubrehan naman nga masobra 500 mg/liter ang biochemical oxygen demand nga na-record sa Asisig Creek base sa pinakaulihi nila nga water analysis.
Una na gin-report nga ginabutangan sang personnel sang UR-SURE sang apog kag iban nga material ang tubig sa suba agud matinluan kag indi magbaho.
‘SIRADUHAN ANG DRAINAGE’
Bilang solusyon sa problema, nahisugtan sa technical conference nga siraduhan sang UR-SURE ang ila mga drainage canal agud indi na magbuswang pa sa Asisig Creek.
Sayluhon man nila ang mga organic matter sa ila planta sa Passi bangud nagapadayon pa ang ila operation.
Natalana man i-rehabilitate sang UR-SURE ang ila water treatment facilities.
‘I-MONITOR’
Desidido nga magpasaka sang kaso ang EMB 6 batuk sa UR-SURE kun mapaslawan sa pagtuman sa ila pasalig.
Sandig sa Clean Water Act, ginadumili-an ang pag-discharge ukon pag-deposit sang anuman nga material, direkta ukon indi direkta, sa anuman nga bodies of water nga makatuga sang polusyon ukon makaguba sa natural nga water flow.
Mahimo naman mapenahan ukon mapreso ang mga natungdan kag posible man mapaserado ang natungdan nga kumpaniya kun mapamatud-an may paglapas.
‘INTERNAL INVESTIGATION’
Nag-conduct na sang internal investigation ang UR-SURE angut sini.
Base sa ginpadala nga official statement sang UR-SURE, indi pa sila tul-id kun ano ang gintunaan sang problema. (JoMaque)