Iloilo City: 11 ka balay, naabo sa sunog sa Lapaz!

By: Aine Grace Bravo

Ginapatihan nga naghalin sa balay ni Julie Moliño nga gina-arkilahan ni Roel Villagracia ang kalayo nga nag-abo sang 11 ka mga balay sa Brgy. Lopez Jaena, Lapaz kahapon sang kaagahon.

Suno kay Punong Barangay Marjorie Gregorios, kalabanan sa mga residente ang nagatudlo sa balay ni Moliño bangud sang nabatian nga lupok kag pag-ibwal sang kalayo. Madasig nga naglaton sa mga kaiping nga pamalay ang kalayo nga lunsay human sa light materials.

Lakip sa mga totally-damaged ang balay nanday Haydee Poticar, Julie Moliño, Jury Pedrajas, Francis Siray, Allan Siray, Dorothy Patron, Jonathan Gatunggay, Girlie Ricaforte, Jojo Sumagio, Marivic Layag kag Marco Tipawan. Duha naman ka balay ang partially-damaged nga ginapanag-iyahan nanday Renato Pahitamos kag Dativa Sarabia.

Temporaryo nga nagatiner sa barangay hall kag day care center ang mga nasunugan. Ginabanta naman sa 700 mil pesos ang balor sang kahalitan sa sunog.