By: Aine Grace Bravo
Nagpangayo sang pasaylo si Kagawad Ed Peñaredondo sa iya mga kapaltahan kag kakulangan bilang konsehal sang syudad.
Sa iya nga privilige speech sa regular session sang konseho, partikular nga ginpangayuan sang kapatawaran sang konsehal ang mga ginbuy-an sini nga tinaga sang nagligad nga tuig nga nakasaklaw sa balatyagon sang iban nga tawo. Gintumod ni Peñaredondo ang mga vendors sa Iloilo Central Market nga iya nahambalan sang indi maayo nga tinaga sa session sang konseho sang Disyembre 9.
Gin-athag sang konsehal nga normal lang sa tawo nga matak-an ukon maakig apang wala siya nagatumod sa mga personalidad. Sa madumduman, nagpamuyayaw sa session si Peñaredondo kag ginhambalan ang mga vendors sa Central Market nga wala sila sang kinamatarong nga magdikta sa syudad. Kadungan ini sa pag-aprubar sang City Council sang bag-o nga terms of reference sa plano nga pag-revitalize sang merkado.