By: Jocelyn Gelloagan-Maque
Liwat nga nagpakita sang ila mangin performance sa Ati-Ati dance competition sang Dinagyang Festival 2015 ang mga tribu sa opening salvo kaina sang hapon.
Gindugukan sang mga tumalan-aw ang maduagon nga pagpasundayag sang mga tribu sa atubang sang Freedom Grandstand kag apat pa ka judging areas sa syudad.
Antes ang performance, nagparada ang mga tribu halin sa Iloilo Provincial Capitol grounds padulong sa Freedom Grandstand soksok ang ila costumes.
Nag-upod man sa parada ang mga kandidata sang Miss Iloilo Dinagyang 2015.
Ang siyam ka mga tribu ginalakipan sang Tribu Paghidaet, Panayanon, Obreros, Lawudnon, Baybayanon, Salognon, Atub-Atub, Ilonganon kag Milagrosa.
Magluwas sa Freedom Grandstand, ang apat pa ka judging areas ginalakipan sang Iloilo Provincial Capitol, Delgado-Mabini Streets, Quezon-Ledesma Streets kag Iznart Street.
Wala naman sang may gin-report nga insidente samtang ginahiwat ang aktibidad bangud sang hugot nga pagbantay sang kapulisan.