LTFRB 6, magahiwat sang hearing sa ginaduso nga pagpanubo sang flagdown rate sa mga taxi

By: Aine Grace Bravo

Magahiwat sang simultaneous hearing ang mga regional offices sang Land Transportation Franchising and Regulatory Board (LTFRB) may kaangtanan sa pagpanubo sang flagdown rate sa mga taxi kag plete sa mga UV express kag airport shuttle services.

Ginkonfirmar ni Atty. Jose Marie Lamparero, legal officer sang LTFRB 6, nga nagpadala sang memorandum order ang central office para sa simultaneous hearing sa Enero 16, alas 10 sang aga. Ang hearing may kaangtanan suno sa iya sa gin-file nga petisyon ni Negros Oriental Rep. Manuel Iway nga panubuan sa 30 pesos ang 40 pesos nga flagdown rate sang mga taxi bangud sang nagapadayon nga pagnubo sa presyo sang petrolyo.

Ginaduso man ni Congressman Iway ang pagpanubo sa ginasukot nga per succeeding kilometer rate sang taxi nga himuon P2.50 halin sa 3 pesos.