By: Aine Grace Bravo

Pilason ang tatlo ka lalaki matapos nagpinalupok sang pusil sa sulod sang videokehan ang gin-alegar bodgyguard ni Estancia Mayor Rene Cordero nga pulis sang Sabado sang gab-i.

Ginkilala ang mga biktima nga kanday Roland Katipunan, 30-anyos kag utod nga si Giovanni, 24-anyos, lunsay sang Brgy. Salngan, Passi City kag abyan nga si Ricky Fiebre, 37-anyos sang Tagubong, Passi City. Ginpahayag nga nasuya si PO1 Argie Esico assigned sa Estancia PNP sang nakita nga nagakadlaw ang grupo sang mga biktima samtang nagakanta siya.

Gin-alegar nga gulpi lang nagpamuwersa ang pulis kag nagpanghangkat sang away kadungan sang pagpalupok sang pusil sa semento. Napilasan sa tuo nga abaga si Roland samtang wala naman nga tiil ang igo ni Giovanni kag nakibyasan sa wala nga parte sang ulo si Fiebre. Wala naigo sang bala ang duha pa ka kaupod sang tatlo ka biktima nga sanday Albert Salazar kag alyas Joel.

Ginpanghiwala naman ni Mayor Cordero nga bodyguard niya si Esico. Pa-athag sang alkalde, si PO1 Esico lang ang masami nga ginapadala sa iya sang hepe sang Estancia PNP kon magpangayo siya sang security detail sa iya mga lakat.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply