By: Aine Grace Bravo
Ginrekomendar sang Land Transportation Franchising and Regulatory Board (LTFRB) 6 sa central office nga aprubahan ang petition for fare reduction nga gin-file sang Iloilo City Loop Alliance of Jeepney Owners and Drivers Association (ICLAJODA).
Suno kay LTFRB 6 Legal Officer Atty. Jose Mmarie Lamparero, gin-rekomendar man nila ni LTFRB 6 Director Romulo Bernardes nga ipatuman sa bilog nga Rehiyon 6 kag indi lang sa syudad sang Iloilo ang fare reduction pananglitan ma-aprubahan. Base sa petition sang ICLAJODA, buhinan sang 50 sentimos ang P7.50 nga regular fare sa mga depasahero nga jeep sa syudad.
Kumpiyansa naman si Lamparero nga ma-aprubahan ang petisyon bangud wala sang nagpamatuk. Nag-file sang petition ang ICLAJODA bangud sang sunod-sunod nga pagnubo sa presyo sang langis.