By: Aine Grace Bravo
Handa ang Task Force Anti-Squatting and Illegal Structures ukon Task Force ASIS nga kakason ang mga kiosko nga ginbutang sa kilid sang Jaro plaza kon may mandu halin sa ila chairman kag sa alkalde sang syudad.
Gin-ako ni Engr. Bobby Dumanil, head sang Task Force ASIS, nga subong niya lang nahibaluan ang isyu sang mga vendors nga naga-okupar sa kilid sang Jaro Plaza sa pagpati nga kinaandan na nga ginapasugtan ang pagbaligya sa lugar sa tiun sang Jaro Agro-Industrial Fair. Wala man sang ideya si Dumanil sa ordinansa nga nagadumili sa pagamit sang sidewalks, mga pampubliko nga lugar kag plaza agud patindugan sang mga stalls kag kiosko.
Ang chairman lang suno sa iya sang task force nga si City Legal Officer Dan Dinopol kag si Mayor Jed Patrick Mabilog ang makamandu sa ila nga kakason ukon hawanan ang kilid sang Jaro Plaza agud indi mangin sablag sa mga naga-agi.