By: Aine Grace Bravo
Indi pa handa ang kampo ni disqualified Governor Exequiel Javier nga batunon ang pagpungko ni Governor Rhodora Cadiao.
Suno kay Atty. Guillermo Alcantara, legal counsel ni Javier, ginapanindugan sang iya kliyente nga siya gihapon ang gobernador sang probinsya sa pagpati nga irregular ang pag-serbe sang writ of execution. Magluwas sini, may gin-file man nga petition si Javier sa Korte Suprema nga nagahinyo sang temporary restraining order.
Mahimo man suno kay Alcantara nga mapasakaan sang kaso nga direct assault against a person in authority ni Javier ang abogado ni Cadiao nga nang-agaw sang mikropono sa flag ceremony sa provincial capitol sang Lunes. Ginbasehan sini ang pahayag ni DILG 6 Director Anthony Nuyda nga sang Martes lang nag-epekto ang pagpungko ni Cadiao bilang gobernador. Buot silingon suno sa iya, si Javier pa ang ginakilala nga gobernador sang Lunes.