By: Aine Grace Bravo
Iga-serbi subong nga adlaw sang Department of Interior and Local Government (DILG) Provincial Office ang suspension order batuk sa tatlo ka empleyado sang Provincial Capitol may kaangtanan sa kaso nga paglapas sa Anti-Graft and Corrupt Practices Act.
Suno kay DILG Provincial Director Teodora Sumagaysay, lakip sa serbihan sang suspension order sanday Provincial Accountant Lyd Tupas, Asst. Department Head Sandra Bionat kag anay General Services Office Head Ramie Salcedo. Nag-ugat ang kaso sa ginsudlan nga kontrata sang provincial government sa National Power Corporation nga gin-take over sang ulihi sang Green Core Geothermal, Inc. para sa bulk supply sang elektrisidad halin 2007 tubtub 2011.
Ginhimo ang kontrata bilang antisipasyon sa Iloilo Multi-Purpose Convention Center sa diin ginpataasan contracted energy. Gin-alegar nga nag-overpay ang provincial government sa wala sini nakonsumo nga elektrisidad halin sa Green Core nga nagalab-ot sa 4 milyones pesos.
Napamatud-an nga guilty sa pag-conduct sang prejudicial to the best interest of the service kag neglect of duty sanday Bionat, Tupas kag Salcedo rason sang pagpapanaug sa ila sang suspension order.