By: Aine Grace Bravo

Nagsumpakilay sa session sang City Council kahapon sanday Kagawad Plaridel Nava kag Kagawad R. Leoni Gerochi kasunod sang privilege speech ni Nava may kaangtanan sa transport summit nga ginhiwat sa syudad sang nagligad nga semana.

Ginkuwestyun ni Gerochi kon nga-a wala siya nahatagan sang kopya sang report ni Nava. Gin-athag naman ni Nava nga indi official ang iya privilege speech bangud kaugalingon niya nga inisyatibo ang transport summit rason nga indi siya mapuwersa magsumiter sang report. Luyag lang sang konsehal nga mapahibalo ang konseho sa tuyo nga mapasaran sang resolution ang mga suhestyun nga reporma sa trapiko sang syudad.

Ginkatingala ni Nava kon nga-a si Gerochi lang ang nagreklamo nga wala sang kopya wala sapayan gin-isa isa na niya sa privilege speech ang resulta sang transport summit. Nagapati si Nava nga nahisa lang si Gerochi sa iya performance bilang aktibo nga chairman sang Committee on Transportation nga gina-uyatan sadtu sang ulihi.

Kasunod sini, ginhangkat ni Nava si Gerochi sang debate sa Iloilo Freedom Grandstand apang ginkadlawan lang sang konsehal. Suno kay Gerochi, wala siya nahadluk mag-debate apang indi na magpakanubo sa level ni Nava.

Ginkumpirmar naman ni Kag. Joshua Alim nga na-areglo na ni Mayor Jed Patrick Mabilog ang away sang duha ka konsehal.

Leave a Reply