Iloilo City: LTFRB 6, nagpanindugan sa istrikto nga pagpatuman sang P10 nga provisional flag down rate reduction sa mga taxi wala sapayan sang Motion for Reconsideration sang mga operators

By: Jocelyn Gelloagan-Maque

Istrikto nga gina-implementar sang LTFRB 6 ang Memorandum Circular sang central office nga nagapanubo sang flag down rate sang mga taxi sa P10.

Gin-athag ini ni LTFRB 6 Director Romulo Bernardes bisan pa ginpanindugan ni Atty. Joseph Go, tag-iya sang Light of Glory taxi, nga wala nila ginsunod ang mandu bangud sang Motion for Reconsideration nga gin-file sang ila grupo.

Suno kay Go, nakasaad ini sa Section 11 Rule 13 sa Rules of Procedures and Practice sang ahensya sa diin nasaad nga indi mag-epekto ang desisyun sang LTFRB Board kon may pending nga Motion for Reconsideration.
Ginpabutyag ni Bernardes nga gina-monitor nila ang mga taxi units sa rehiyon agud masiguro nga ginasunod sang mga drivers ang Memorandum Circular nga nag-epekto sang Marso 6.