By: Aine Grace Bravo

Nagreklamo ang pila ka mga residente sa Barangay Calubihan, Jaro batuk kay Punong Barangay Rammy Guintibano.

Suno kay Jojo Diamante, kalabanan sa mga benefesyaryo sang relocation sites ang mga himata ni Punong Barangay Guintibanio. Suno pa kay Diamante, indi man apektado sang naglabay nga bagyo kag road-widening project ang mga himata ni Guintibano.

Gintumod sini ang manghod sang punong barangay nga si Lalaine Guintibano nga naga-star sa Uswag Subdivision sa San Isidro, Jaro bisan pa nga wala man mahalitan sang bagyo ang iya balay. Nag-istar man suno kay Diamante ang nanay sang punong barangay nga si Ella Guintibano sa River Plain Subdivision sa Camalig, Jaro bisan pa nga wala na-apektuhan sang road widening ang balay.

Gin-alegar man ni Diamante nga nagamit sang dummy si Guintibano agud makakuha sang housing unit para sa iya mga himata. Ginkadlawan lang sang punong barangay ang akusasyon batuk sa iya. Ginpanginwala man ni Iloilo City Urban Poor Affairs Office (ICUPAO) Executive Director Wilfredo Jurilla nga may sindikato sa iya talatapan.

Leave a Reply