By: Jocelyn Gelloagan-Maque

Nautod ang dila sang 52-anyos nga lalaki sa Barotac Nuevo matapos ginkagat sang 46-anyos nga balo nga ginpahayag tuyo sini himuslan.

Napasaka na ni alyas Nene ang kaso nga attempted rape batuk kay alyas Lugok nga iya man lang kasilingan.

Ginpahayag ni Nene nga natabu ang insidente sang Marso 21 sang kaagahon samtang nagakatulog siya kag naga-isahanon sa ila balay.

Ginsaysay sang babaye nga nakibot siya sang nakabugtaw nga ginahurikap sang suspek.

Nanginpadlos pa si alyas Nene apang ginpabutyag sini nga ginpugos ni Lugok ang iya duha ka kamot kag ginpunggan man ang duha ka tiil.

Suno kay alyas Nene, naka-tiempo siya sang ginhalukan ni Lugok sa bibig gani nga ginkagat sini sang todo ang dila sang suspek tubtob nautod.

Duguon nga nagpalagyo ang suspek samtang nagpangayo sang bulig si Nene sa iya utod nga malapit man lang sa iya balay.

Nadakpan si Lugok kag preso na sa karsel sang Barotac Nuevo Police Station.

Leave a Reply