By: Jocelyn Gelloagan-Maque
Nagpangisog pa si Pastor Ed Casidsid sang Jesus Disciples Church sa Barangay Alaguisoc, Jordan, Guimaras sa iya kampanya kontra illegal drugs.
Ini ang ginpasiguro ni Casidsid matapos gintiro ang simbahan kagab-i sa diin nawasak ang crystal sa idalum sang krus.
Imbes nga makulbaan, ginpahayag ni Casidsid nga padayunon niya ang kampanya agud mapabalo sa publiko ilabe na sa mga pamatan-on ang kalainan nga dala sang illegal drugs.
Nagapasalamat si Casidsid nga wala sang nasamaran sa mga young people nga yara sa sulod sang simbahan kagab-i sang natabu ang insidente.
Antes sini, ginhabuyan man ang simbahan sang bato nga naputos sang papel nga may nakasulat sang pagpamahug kag may bala sang pusil kag ginpalukpan man sang pusil ang guwa sang simbahan.