Sara, Iloilo: Pamilya sang Deck Cadet nga ginpahayag naghikog sa barko samtang naga-OJT, nagapati nga may foul play sa kamatayon sang himata!

By: Jocelyn Gelloagan-Maque

Nagapati ang pamilya sang Deck Cadet nga si Felipe Borra III sang Sara nga may foul play ang iya kamatayon.

Indi magpati si Ms. Marfe Borra nga nagtuyo maghikog ang iya utod paagi sa paghigot sang paha sa li-og kag nagbitay sa barko sang Marso 19.
Suno kay Marfe, antes ang insidente, nakatawag pa ang iya utod nga madungka sila sa Singapore kag ma-dry dock sa Subic sa Mayo.

Si Felipe Borra III ang graduating student sang John B. Lacson Foundation Maritime University sa kurso nga BS Marine Transportation kag naga On-the-Job Training (OJT) sa barko sang Philstar Maritime Corporation.

Personal nga nagkadto sa balay nanday Marfe ang General Manager sang Philstar Maritime Corporation nga si Captain Victorio Melalios kag nagpahibalo sa kamatayon sang iya utod sang paagi sa paghigot sang paha sa li-og kag pagbitay sa barko.