Transport groups sa Western Visayas, maga-upod sa nationwide transport caravan batuk JAO!

By: Aine Grace Bravo

Maga-upod ang transport groups sa bug-os nga rehiyon sa nationwide transport caravan.

Isa ini sa mga nahisugtan sa forum sang nagkalain-lain nga transport groups sa Western Visayas may kaangtanan sa ila ginareklamo nga tuman ka daku nga multa sa mga magalapas sang rules and regulations sa land transportation nga nakabutang sa Joint Administrative Order (JAO). Suno kay Mr. Boyet Parcon, presidente sang Iloilo City Loop Alliance of Jeepney Owners and Drivers Association (ICLAJODA), natalana ang caravan sa Abril 22 halin alas-8 sa aga.

Magluwas sa transport caravan, magafile man sang petition ang mga transport groups sa rehiyon kag ipasa sa DOTC, LTO kag LTFRB batuk sa implementasyon sang JAO. Nagalaum si Parcon nga pamatian sang gobyerno ang gina-ayo sang mga operators kag drivers sang depasahero nga mga salakyan.