Pototan, Iloilo: Pulis, patay matapos ginbuno; hepe sang Pototan PNP, nabun-an man; suspek, patay sang natiruhan!

By: Aine Grace Bravo

Patay ang pulis samtang pilason ang hepe sang Pototan Police Station matapos ginpangbuno sa Brgy. Naslo kaina sang kaagahon.

Nagresponder ang Pototan police sa pagpanguna ni Sr/Insp. Ariel Corcino matapos nakabaton sang report nga nagawaras si Arnold Dagohoy. Ginpahayag nga ginhaboy sang bato sang hubog nga suspek ang patrol car samtang nagapasulod sa lugar.

Suno kay acting Vice Mayor Indo Paluay, kumpiyansa nga ginpalapitan sang mga pulis si Dagohoy bangud wala man sang nakita nga hinganiban apang nakibot ang mga ini sang gulpi ginkuha sang suspek ang kutsilyo nga nalubong sa balas. Napatay si PO1 Dan Carlsberg Bayogos bangud sang pilas sang pagkabuno sa dughan kag tiyan. Ginbuno man sang suspek si Sr/Insp. Corcino sa butkon kag tiyan gani napilitan ini nga tiruhon si Dagohoy agud ma-neutralize.

Napatay si Dagohoy sa Iloilo Provincial Hospital bangud sang pilas sa likod. Natalana naman operahan si Sr/Insp. Corcino.