By: Nemesio Martirez
Ginadudahan nga ginagamit nga lugar sang illegal drug activities ang pila ka kwarto sa Budget Inn sa Jaro. Ini ang ginbuyagyag ni Alyas Angel, front desk sang Inn sa hearing committee on womwn and children sang city council nga ginapamunuan ni Councilor Leizel Joy Salazar kahapon. Suno kay Angel, naga-check in sa Budget Inn ang grupo sang kalalakihan kag nagatiner sang duha tubtob tatlo ka adlaw, makaduha ka beses sa isa ka bulan. Sa tion suno sa iya nga mag-akupar sang kwarto ang grupo, nagaguwa-sulod man sa hotel ang kabataan nga naga-edad sang indi magnubo sa pito ka tuig kag may dala nga plastic ukon bag ukon nagabitbit sang libuhon nga kwarta. Ginapapatihan sang management sang Inn nga naga-repack sang illegal drugs sa isa sa mga kwarto sa Inn ang grupo sang kalalakihan kag ginapadala sa mga menor de edad nga nagaserbi bilang runner. Gina-alegar ni Angel makaduluda gid ang hulag sang mga kalalakihan bangud pamilyar na sa iya ang mga hitsura. Natukiban man nga nagapauli lang sa Barangay Desamparados ang grupo. Ginpahayag ni Angel nga wala sila nagreport sa Philippine Drug Enforcement Agency ukon PDEA bangud sa kahadlok nga dumtan sila.