By: Jocelyn Gelloagan-Maque
Pagpangimon ang ginatudlo motibo sa pagpatay kag paglubong sang 23-anyus nga lalaki sa iya 21-anyus nga live-in partner sa Zone 13, Brgy. Calaparan, Arevalo.
Ginpahayag nga ginpatay anay sang suspect nga si alyas Eric ang biktima nga si alyas Bec-bec antes ginlubong sa buho sa likod sang ila balay.
Suno sa iloy ni alyas Eric, nagapangimon na ang iya bata sang gina-rehab pa lang bangud wala gid ini ginbisitahan ni alyas Bec-bec rason nga nagpati nga may iban nga karelasyon ang babaye.
Ginpahayag sa iloy nga si alyas Mercidita, alas 10 y medya kahapon sang aga nakita niya Eric nga nagakutkot sa likod sang balay agud butangan sini sang basura.
Natulugan si alyas mercidita upod sa iya bana kag sang nagbugtaw, iya nakita nga natabunan na ang buho.
Nakita sini ang sulat ni Eric sa ibabaw sang lamesa nga nagapahibalo nga ginpatay kag ginlubong sini si alyas Bec-bec sa likod sang ila balay.
Antes sang insidente, pwersa nga ginpagwa ni Eric sa iya gina-obrahan si Bec-bec kag natumba pa ang ginasakyan nila nga motorsiklo sang naglabay sa Brgy. Baluarte, Molo.
Ginpahayag nga nagsakay sa jeep si alyas Bec-bec kag wala na nakapa-uli sa ila balay sang Sabado sang gab-i.