By: Jocelyn Gelloagan-Maque

Nagsurrender si Erick Mickell Paginado kag nag-ako nga siya ang nagpatay kag naglubong sa iya live-in partner nga si Rebecca Dela Cruz sa Zone 13, Barangay Calaparan, Arevalo.

Suno kay Erick, na-impito siya matapos nag-ako si Rebecca nga may nobyo na ini.

Nakalab-ut man sa iya suno kay Erick ang balita nga may iban pa nga lalaki si Rebecca.

Sa pihak sang pag-ako, ginbasol ni Erick ang nanay ni Rebecca nga suno sa iya, nagapabulag sa ila nga duha.

Gin-ako ni Erick nga nagamit siya sadtu sang illegal drugs apang nagpa-rehab bangud luyag niya magbag-o para sa iya pamilya.

Sanday Erick kag Rebecca ang may tatlo ka tuig nga bata nga lalaki.

Ginsaysay ni Erick nga Sabado sang hapon sang ginsugat niya si Rebecca sa gina-obrahan sini nga fast food chain sa SM City Iloilo.

Suno diri, may natabu pa sa ila sang Sabado sang gab-i. Apang nagdulom suno sa iya ang panulok sang gin-ako ni Rebecca nga may nobyo na ini gani iya ginhigtan sang nylon ang leog kag ginkuga.

Nagkutkot ang suspek sang buho sa likod sang ila balay pagka-Domingo sang aga kag ginhaboy diri kag gintampukan si Rebecca pag-kahapon.

Dugang ni Erick, wala gid nakahibalo ang iya ginikanan kag mga utod sa iya ginhimo.

Leave a Reply