By: Aine Grace Bravo
Maga-abot subong nga aga si Presidente Noynoy Aquino agud bisitahan ang mga nakumpleto kag nagapadayon nga infrastructure projects sa syudad kag probinsya.
Halin sa Iloilo Airport, maga-diretso si Aquino sa President Corazon Aquino Avenue ukon ang 14-kilometer circumferential road agud mag-unveil sang marker kag ang ginpalapad nga Senator Benigno Aquino Avenue. Inspeksyunon man sang pangulo ang nagapadayon nga construction sang 93 million pesos nga Dungon 4 Bridge sa Diversion road, Iloilo Convention Center kag ang 150-million pesos nga Muelle Loney Bridge nga naga-angut sa Muelle Loney Street, City Proper sa Barangay Progreso Lapuz.
Pangunahan man ni Aquino ang pag-unveil sang marker sa Casa Real de Ilolo ukon ang daan nga Provincial Capitol sa alas-2 karon sa hapon. Ini ang pagasundan sang programa sa lobby sang bag-o nga Provincial Capitol building sa diin magahatag sang speech ang pangulo.
Ginalauman man ang pag-abot sang 91 ka mga ambassadors, mga senador, kongresista kag 29 ka cabinet members. Buwas sa aga, pangunahan sang pangulo ang flag raising cemony sa Sta. Barbara para sa ika-117 nga Independence Day rites kag ang vin d’honneur sa Casa Real de Iloilo antes magbalik sa Manila pagkahapon.