By: Aine Grace Bravo
Wala sang epekto sa operations sang Metro Iloilo Water District (MIWD) ang gin-file nga civil case sang bulk water supplier nga Flo Water.
Suno kay MIWD Corporate Secretary Atty. Cyril Regalado, ginpa-athag nila sa hearing nga ang convenience sang magtimbang nga partido ang nagapanguna nga konsiderasyon sa paghatag sang judge sang temporary protection order (TPO). Nasaad mismo sa mandu suno sa iya nga indi dapat maapektuhan ang water distribution sa mga konsumidor.
Sa ginhatag nga TPO, ginamanduan ang MIWD nga i-preserbar ang assets sini kag gina-require naman ang Flo Water nga mag-post sang bond nga doble pa sang sa gina-claim sini sa water district. Gin-athag ni Atty. Regalado nga wala pa siya sang impormasyon kon nakabayad na sang bond ang Flo Water bangud kahapon niya lang nabaton ang order sang korte.