By: Aine Grace Bravo
Gin-reset sa Hulyo 27 ang hearing sa civil case nga gin-file sang Integrated Bar of the Philippines (IBP) Guimaras Chapter angut sa kontrobersiyal nga Guimaras-Iloilo Ferry Terminal.
Suno kay IBP-Guimaras President Atty. Vincent Pascal de Asis, kalabanan sa mga ginpang-subpoena sang korte ang wala nagtambong sa hearing kahapon. May yara man suno sa iya nga nagpakita sa korte apang wala naman sang dala nga mga dokumento rason nagdesisyun ang judge nga i-reset ang hearing.
Ginpahayag ni de Asis nga luyag nila nga magtambong ang mga ginpang-subpoena agud makapresentar sang mga original nga dokumento partikular ang memorandum of understanding ukon MOU nga ginpirmahan sang mga miembro sang Metro Iloilo-Guimaras Economic Development Council (MIGEDC) Lakip man diri ang minutes sang mga natabu halin 2005 tubtub 2009 sang ginhimo ang office of the MIGEDC.
Bangud sini, ginhinyo sang IBP-Guimaras suno kay de Asis nga i-subpoena sa masunod nga hearing sanday Iloilo City Lone District Rep. Jerry Treñas kag Mayor Jed Patrick Mabilog agud maka-testify sa kaso.