By: Aine Grace Bravo
Ginpatay antes ginsunog ang babaye nga kaupod ni Jose Daliva sa nasunog nga JD Calibration Shop sa Tagbak, Jaro sang Mierkules sang gab-i.
Sa autopsy result ni PRO-6 Medico Legal Officer Dr. Owen Lebaquin sa bangkay, nakita nga may duha ini ka patal nga pilas sa tiyan nga agi sang ginapatihan kitchen knife. Matinlo suno kay Lebaquin ang respiratory track sang biktima nga patimaan nga wala ini nakahaklo sang aso halin sa kalayo.
Wala man sang patimaan nga may natabu nga sexual contact ukon sexual abuse sa biktima antes ini ginpatay wala sapayan hublas na ini sang nasapwan. Nagapati si Lebaquin nga nagakatulog ukon nagahigda ang biktima sang ginbuno bangud wala sang mga sinyales nga nagbatu ini.
Ginatugyan naman ni Lebaquin sa kapulisan ang paghibalo sang iban pa nga anggulo kon paano natabu ang krimen. Una na ginpahayag sang SOCO nga posible man ginpatay si Daliva antes ang sunog kon basehan ang pilas sini sa puwak.