Iloilo City: Intelligent Transport System, ginaduso ni Mayor Jed Patrick Mabilog

By: Aine Grace Bravo

Plano ni Mayor Jed Patrick Mabilog nga magpatuman sang intelligent transport system sa syudad.

Isa ini suno sa iya sa gin-diskusyunan sa Transport Summit nga iya gintambungan sa Vietnam sang nagligad nga semana. Ang intelligent transport system suno sa alkalde amo ang pagbutang sang madamo nga CCTV cameras sa mga dalanon agud ma-monitor ang sitwasyon sang trapiko. Makabulig ini sa pag-detect sang mga traffic violations, indi lang sa mga salakyan kundi pati na sa mga pedestrians kag ang madasig nga pag-responder sa mga aksidente sa dalanon.

Tiun na suno kay Mabilog nga ipatuman ang sistema sa syudad apang nagakinahanglan ini sang public consultation ilabe na nga nagabalor sang 50 milyones pesos ang proyekto. Nagpasalig si Mabilog nga konsultahon ang publiko sa iya plano agud mapa-athag ang ka-importante sang Intelligent Transport System kag makuha man ang sentimiento sang tanan nga sector sa sitwasyon sang trapiko sa syudad.