By: Aine Grace Bravo
Anum na ang kumpirmado nga napatay sa pagkatiphag sang Pani-an Pit sa Semirara, Caluya, Antique kahapon.
Kasunod ini sang pagka-recover sa bangkay sang isa pa ka minero nga si Bernie Manrique kaina sang kaagahon. Tatlo pa ang nagapabilin nga missing apang gina-konsiderar na nga nagkalamatay suno kay Antique Governor Rhodora Cadiao. Ginpahayag sang gobernador nga mabudlay ang search operations bangud sang mataas nga tinumpok sang duta nga natiphag.
Base sa isa sa mga survivors nga na-istorya ni Cadiao, ginpahayag nga may mabaskog nga explosion nga nabatian antes ang pagkatiphag sang duta. Nagakaigo na ini nga rason suno sa iya agud untaton ang operasyon partikular sa lugar nga nag-collapse.
Gin-athag naman ni Cadiao nga wala sang Antiqueño nga napatay sa insidente bangud kalabanan sa mga trabahador ang taga-Mindoro kag Mindanao.