MIWD, nanghiwala nga kulang ang gin-deliver nga tubig sa City Hall rason nga nagmala ang mga gripo kahapon

Iloilo City– Napilitan nga magamit sang kasilyas sa Iloilo Terminal Market ang pila ka empleyado sang city government matapos nawad-an sang tubig ang City Hall building kahapon.

Suno kay Building Administrator Victor Facultad, kulang ang gin-deliver nga supply sang tubig sang Metro Iloilo Water District (MIWD) sang Biernes. Apat ka tanker sang tubig suno kay Facultad ang gina-konsumo sang city hall kada adlaw apang nagkulang ang water delivery sang nagligad nga semana.

Ginpaathag naman ni Engr. Warren Palermo, Division Manager sang MIWD, nga wala sila nagapalya sa pag-deliver sang tubig sa city hall. Kon indi maka-deliver sang tubig ang MIWD sa adlaw, ginasiguro sini nga makatayhon sila sa gab-i.

Posible suno kay Palermo nga nalipatan sang in-charge nga magpasaka sang tubig rason nga wala nakatubod ang mga gripo sa city hall. (Aine Grace Bravo)