Iloilo City: Trabahador sa Ulubrahan sang Slug sa Jaro, Nasapwan nga Patay!

Nasulat sa dingding sang kuwarto ang ini nga mga tinaga gamit ang dugo.

Naka-engrave man sa lamesa ang ini nga mga tinaga.

Jocelyn Gelloagan-Maque

Nasapwan nga patay ang trabahador sang Pyrocast Engineering nga nagapang-obra sang slug sa MH Del Pilar, Jaro kaina sang aga.

Ginkilala ang nasapwan kay Adriano Navilla Jr, 22 anyos sang North Baluarte, Molo kag may lacerated wound sa leog kag sa tuo nga parte sang tyan.

Suno kay Chief Inspector Herbert Ballego, hepe sang Jaro Police Station, may nakasulat nga mga tinaga nga“Buhay pa ako Jr” gamit ang dugo sa dingding sang kuwarto sa diin nasapwan si Navilla.

Naka-engrave man sa lamesa ang “buhay pa Jr”.

Indi naman direkta nga mahambal ni Ballego nga si Navilla mismo ang nagsulat sang mga tinaga sa dingding kag lamesa bisan pa may gina-uyatan ini nga kutsilyo sang nasapwan.

Natalana naman ipaidalum sa autopsy ang bangkay ni Navilla.