Iloilo City–Na-alarma si Councilor Rodel Fullon Agado nga masalangisag ang mga barangay officials sa matuod nga partido nga iya paga-updan kabangdanan nagdesisyun nga magsaylo sa Liberal Party kag bayaan sanday Councilors Plaridel Nava kag Joshua Alim.
Apang nagalaum si Agado nga masolbar ang konflicto nanday Alim kag Nava kay Mayor Jed Patrick Mabilog kag makaupod ang duha ka konsehal sa isa ka partido. Bukas gihapon suno sa iya ang LP para sa duha pa ka miembro sang Voltes 5. Nagapasalamat ini nga ginarespeto nanday Alim kag Nava ang iya desisyon.
Ginrason naman ni Councilor Lady Ann “Love-Love” Baronda sa pagsumpa niya sa Liberal Party ang mabakod nga liderato nanday Congressman Jerry Treñas kag Mayor Mabilog. Gin-athag sini nga wala siya sang commitment sa iban nga partido ilabe na sa United Nationalist Alliance (UNA). Kahapon, nagsumpa sa LP sanday Agado kag Baronda upod kanday Executive Assistant Ely Estante kag Punong Barangay Quirico Acap. (Aine Grace Bravo)