Iloilo City–Gintadlong ni Mr. Bryant Zulueta, isa sa mga convenors sang Ilonggo Alliance for Change and Transparency (I-ACT), ang iya ginpaguwa nga statement angut sa problema sang illegal nga druga sa syudad.

Gin-athag ni Zulueta nga wala niya ginmitlang ang pangalan ni Mayor Jed Patrick Mabilog sa iya pahayag kag ginpatihan nga posible 50% sang kita sa illegal drugs sa syudad ang nagakadtu sa alkalde. Gin-ako ni Zulueta nga wala siya sang pruweba kag hearsay lang ang iya ginbasehan sa statement apang na-realisar ang negatibo nga resulta sang ginbuy-an nga statement rason nga nag-sorry ini kay Mabilog kag bisan kay PDEA 6 Director Paul Ledesma. Suno kay Zulueta, tuyo lang kuntani sini nga maklaruhan sa mga isyu kag nagalaum nga maguwa ang kamatuoran.

Dugang ni Zulueta, wala ini sang personal nga akig kag kalain sang bu-ot sa alkalde kag sa pagkamatuod, nagadayaw siya sa liderato ni Mabilog nga napatahum kag napa-uswag ang syudad. (Aine Grace Bravo)

Leave a Reply