Iloilo City Council
Iloilo City Council (photo (c) Iloilo City Council website)

Iloilo City–Nangin mainit ang session sang City Council kahapon matapos ginkakasan sang tanan nga committee chairmanships sanday Councilors Joshua Alim kag Plaridel Nava.

Ginpanindugan ni Councilor Eduardo Peñaredondo nga madugay na ginplano ang reorganization sang committee chairmanships gani indi mahimo nga wala nakahibalo sanday Alim kag Nava. Suno kay Peñaredondo, wala man nabutang sa internal rules sang Sanggunian Panlungsod nga dapat pahibaluon ang tanan nga miembro kon may himuon nga reorganization. Pormalidad na lang suno sa iya ang sulat nga nagapabalo sang plano kay Vice Mayor Jose Espinosa III.

Indi lang pulitika suno sa konsehal ang pagbalasa sang mga komitiba kundi nagatuyo man nga ma-preserbar ang development sang syudad. Nagapati si Peñaredondo nga ginasabotahe nanday Alim kag Nava ang mga nagatabu nga kaayuhan sa syudad sa mga pag-atake kag pagakamalaot nila kay Mayor Jed Patrick Mabilog.

‘Biktima sang kalampingasan nga pulitika’

Daku naman ang pagpati ni Councilor Nava nga may kahilabtanan ang alkalde sa balasahay. Natabinas suno sa iya si Vice Mayor Espinosa sa session kahapon nga nagpatawag sang sinapol si Mayor Mabilog antes ginduso ni Peñaredondo ang reorganization sa konseho.

Para naman kay Alim, nabiktima lang sila ni Nava sang iya gintawag “kalampingasan” nga pulitika. Kumbinsido si Alim nga wala sila ginbawian ni Nava sang committee chairmanships kon nagsumpa sa Liberal Party. Ginpanindugan ni Alim nga indi ini pwede bangud ginasuportahan nila si Vice President Jejomar Binay sang United Nationalist Alliance (UNA).

Sa reorganization, ginbawi kay Alim ang chairmanships sa Committees on Police Matters, Rules and Ordinances kag Urban Poor kag ginkakas man nga majority floor leader. Nagpungko bilang bag-o nga majority floor leader si Peñaredondo. Ginkakas naman si Nava nga chairman sang Committees on Transportation, Ways and Means, kag Domestic and International Relations. (Aine Grace Bravo)

 

Leave a Reply