Iloilo City–Gintawag ni Rizal Alido, secretary-general sang bag-o tukod nga transport group sa syudad, nga malisyoso ang report nga may nagkumbinser sa ila nga taga-City Hall nga magtukod sang City Loop Integrated Alliance of Jeepney Operators and Drivers Association (CLIAJODA) agud ibunggo sa Iloilo City Loop Alliance of Jeepney Owners and Drivers Association (ICLAJODA) ni Raymundo “Boyet” Parcon.

Suno kay Alido, indi nila kinahanglan ang bulig sang iban nga tawo bangud makasarang sila nga magtukod kag dumalahan ang grupo. Naghalin sila suno sa iya sa ICLAJODA agud makalikaw sa posible kaso nga ipasaka kontra kay Parcon bangud sa ginpahayag mga kautangan sang grupo sini. Madugay man ginareklamo sang iya mga miembro si Parcon sa kapaslawan sini nga magpaguwa sang financial report.

Wala naman nalingkang si Parcon sa mga akusasyon sa iya ni Alido. Suno kay Parcon, si Alido kag indi siya ang may ginahimo nga kamala-malahan sang miembro pa ini sang ICLAJODA.

Madamo suno kay Parcon nga mga jeepney operators ang makapamatuod sang mga ginpahayag pagpanonto ni Alido. Gina-claim ni Parcon nga may mga ebidensya siya nga nagapakita nga linibo ka mga koleksyon sang grupo ang wala gin-remit ni Alido.

Bisan ang presidente mismo sang CLIAJODA nga si Jeffrey Casiano ang indi man maka-agwanta sa ginahimo sa ila ni Alido. Nagapati si Parcon nga ginahimo ni Alido ang tanan nga kabutigan agud gub-on siya kag pahalinon nga presidente sang ICLAJODA. (Aine Grace Bravo)

Leave a Reply