Day 1 sang COC Filing, nangin matawhay pa suno sa city kag provincial Comelec

Read Time:1 Minute, 34 Second

Ginsugata sang paghaksanay nanday Mayor Jed Patrick Mabilog kag Councilor Plaridel Nava ang una nga adlaw sang filing sang certificate of candidacy para sa May 2016 elections sa opisina sang city Comelec kahapon.

Nagsumalangay ang duha sang nagpadulong sa City Comelec si Nava agud updan si Councilor Joshua Alim sa pagfile sang iya COC sa pagka-City Councilor samtang si Mabilog ang nangin dinapit nga bisita naman sang mga vendors sang Iloilo Tterminal Market. Suno kay Nava, ang pagkumustahanay kag paghaksanay nila ni mabilog ang pagpakita sang ila political maturity. Ginpasalig sang konsehal nga wala na sang matabo nga komprontasyon sa tunga nila sang alkalde pananglitan nga magtabu-ay sila.

Matawhay naman ang opisina sang Provincial Comelec Office kahapon samtang nagahulat sang mga maga-file sang COC sa pagka-gobernador, vice governor, board members kag congressmen sa lima ka legislative districts. Suno kay Provincial Comelec Officer Atty. Elizabeth Doronila, pasado alas-3 na kahapon sang hapon nag-file ang una nga indibidwal nga nagahandum magpadalagan nga governor nga si Mr. Diopito Gonzales sang Barangay Binalod, Alimodian kag isa ka negosyante sang peanut butter.

Sa pihak nga bahin, 11 ka kandidato sa pagka-mayor, walo ka sa pagka-vice mayor kag 82 sa pagka-Sangguniang Bayan members ang nag-file sang COC sa kabanwahanan kahapon. Sa record sang Provincial Comelec Office, ang 11 ka nag-file sa pagka-alkalde ginalakipan nanday Mayor Alex Centina sang Calinog, Jose Miani sang Carles, Sandy Boy Salcedo sang Concepcion, Onal Golez sang Dumangas, Melina Requinto sang Estancia, Jason Gonzales sang Lambunao, Christian Sorongon sang New Lucena, Grace Lim sang Pototan, Isabelo Maquino sang Sta. Barbara, Mayor Peter Paul Lopez sang San Dionisio kag Vice Mayor Victor Tabaquirao sang Tubungan. Ang mga kandidato naghalin sa nagkalain-lain nga partido pareho sang Liberal Party, Nationalist People’s Coalition, United Nationalist Alliance, kag may nagpadalagan man nga independent. (Aine Grace Bravo)