Numero sang mga napatay sa nagkulob nga MB Tawash, nagsaka na sa pito!

Read Time:1 Minute, 18 Second

12087246_1221598817857258_7945695272921060882_o (1) — *Ang nagkulob nga MB Tawash sa tunga-tunga sang Iloilo-Guimaras Strait. (Photos by Coast Guard-Iloilo*

Iloilo City — Nagsaka sa pito ang mga napatay sa pagkulob sang MB Tawash motorbanca sa tunga-tunga sang Iloilo kag Guimaras Strait kahapon.

Gindeklarar nga napatay kaina sang kaagahon sa Iloilo St. Paul’s Hospital si Mary Anne Gallego.

Una na nga nakumpirmar ang pagkapatay sang mga crew nga sanday Larry Abella nga presidente sang Jordan Motorbanca Sailors’ Association kag Robin Gania, 54-anyos nga makinista sang pumpboat.

Napatay man ang mga pasahero nga sanday Cora Ganila, mag-utod nga Mark Reial kag Luke Shylle Matta nga anum ka siyam ka tuig kag Cristine Darrly Vasquez.

Padayon man nga ginabulong sa ospital sa syudad sanday Sherry Beth Silverio kag Riz John Sadaba.

Wala untat ang pagpangita sang coast guard kag mga volunteer groups sa mga missing nga pasahero nga snday CJ Gamotia kag Chayne Matta.

Nakita na kaina sang aga ang nagkulob nga MB Tawash sa Barangay Tacay Buenavista.

“Financial Assistance”

Magahatag sang financial assistance ang Jordan Motor Banca Cooperative sa pamilya sang mga napatay nga pasahero kag tripulante sang MB Tawash nga nagkulob kahapon.

Suno kay Jordan Motor Banca Cooperative President Ofelia Canja, magahatag ang insurance company sang P200,000 sa mga napatay nga biktima kag P100,000 naman sa mga biktima nga may permanent disability.

May una na ginhatag nga panggastu sa mga biktima nga na-ospital suno kay Canja samtang wala pa makasapol ang mga miembro sang board sang asosasyon. (JoMaque)