DepEd 6, gin-abi abi ang pagkabalaka sang City Government para maakomodar ang mga incoming Senior High School students sa masunod nga School Year

Iloilo City – Gina-abi-abi gid sang Department of Education (DepEd 6) ang pagkabalaka sang city government para ma-akomodar ang incoming senior high school students sa masunod nga school year.

Pahayag ini ni DepEd 6 Information Officer Lea Belleza sa plano sang syudad nga mag-utang sang P360 million agud gamiton sa pagpatindog sang school buildings para sa incoming Grade 11 students.

Ginpahayag ni Belleza nga ka-partner nila ang Local Government Unit (LGU) agud mangin madinalag-un ang K-12 program.

Apang gin-athag ni Belleza nga may commitment na ang DPWH sa DepEd nga ipatindog ang 225 ka classrooms nga kinahanglan sang syudad para sa senior high school students.

Katunga sang 225 ukon 113 ka classrooms suno kay Belleza ang una nga ipatindog sang DPWH subong nga tuig para sa Grade 11 kag ang katunga ang tapuson sa masunod nga tuig para sa Grade 12 students.

Gin-athag dugang ni Belleza nga base sa ila record, 4 mil 563 lang ang incoming senior high school students sa pampubliko nga mga eskwelahan sa syudad kag 2 mil 433 sa mga pribado nga buluthuan ukon kabug-usan nga 6 mil 996, mas manubo sa ginpresentar nga figure ni Councilor Jason Gonzales sa session sang city council sang Martes nga 11 mil 950. (JoMaque)