drug bust 2Pototan, Iloilo–Napunggan sang mga jail guards on-duty sang Bureau of Jail Management and Penology (BJMP) sa Barangay Poblacion ang plano nga pagpalusot sang illegal nga druga sa presuhan kahapon.

Kasunod ini sang pagka-dakop sa 17-anyos nga lalaki nga tuyo magdala sang illegal nga druga sa iya napreso nga amay. Suno kay Sr/Insp. Ariel Corsino, ang hepe sang Pototan PNP, ginsulod sang menor-de-edad sa kapayas ang isa ka bulto sang illegal nga druga kalakip ang mga plastic sachets apang natukiban sang gin-inspeksyon sang mga jail guards.

Ginabanta nga indi magnubo sa P20, 000 ang balor sang suspected shabu kon ma-repack na sa sulod sang presuhan kag mabaligya.  Nagpamalibad naman si Corsino nga pangalanan ang preso nga padal-an kuntani sang illegal drugs sang iya bata. Apang ginsugid sini nga may kaso ang preso angut sa illegal drugs kag naga-istar sa Barangay Malusgod, Pototan.

Yara na sa kustodiya sang Pototan police ang menor-de-edad kag pasakaan naman sang dugang nga kaso ang preso bangud sa pagamit sini sa iya bata nga courier sang illegal drugs. (Aine Grace Bravo)

Leave a Reply