ICPO, nagdeploy sang mga pulis sa Tacas kasunod sang shooting kag straffing incident!

Jaro, Iloilo City–Nagdeploy sang mga pulis ang Iloilo City Police Office (ICPO) sa Barangay Tacas agud magbantay sang seguridad sa lugar.

Kasunod ini sang pagtiro-patay kay Archie Degoma sang Barangay Balantang matapos nagtambong sa birthday party, Marte sang gab-i. Lakip man diri ang pag-straffing sa balay sang isa sa mga suspek nga si Rodney Jacolina alyas Nono kahapon.

Ginmanduan ni ICPO-OIC Kashmir Disomangcop si C/Insp. Herbert Ballego, hepe sang Jaro PNP, nga i-augment ang mga personnel sang Iloilo City Public Safety Company sa barangay. Suno kay Disomangcop, tuyo sini nga mapahagan-hagan ang tensyon kag kahangawa sang mga pumuluyo sa posible pagbalusay sang pamilya Jacolina kag Degoma.

Gina-alegar nga pamilya Degoma ang nag-straffing sa balay ni Nono Jacolina kahapon. Nagapabilin naman nga at-large ang magpakaisa nga Jacolina. (Aine Grace Bravo)