Inmate sa BJMP Ungka Jaro, nasapwan nga patay!

Iloilo City — Patay na sang nasapwan ang inmate sa Bureau of Jail Management and Penology (BJMP) sa Ungka Jaro kaina sang aga.

Ginkilala ini kay Allan Guillergan sang Monica-Blumentritt City Proper.

Suno kay Jail Chief Inspector Vicente Papelira, OIC warden sa BJMP-ungka, nasapwan si Guillergan sa iya kwarto-kwarto sa sulod sang selda nga may dugo sa baba kag wala na nagaginhawa.

Gindala pa ini sa clinic sang presuhan apang wala na natabangan.

Nagapati si Papelira nga wala sang foul play sa kamatayon ni Guillergan nga ginpahayag may ginabatyag sa lawas.

Apang mas maayo man suno sa iya kon ipa-autopsy sang pamilya ang bangkay agud mabal-an ang rason sang kamatayon ni Guillergan.

Si Guillergan ang isa sa pinakamadugay na nga preso sa BJMP ungka nga may kaso may kaangtanan sa illegal nga druga. (JoMaque)