Iloilo City–Gin-akusaran ni Punong Barangay Esing Villanueva sang South San Jose, Molo nga asta lang sa interview si Philippine Drug Enforcement Agency (PDEA) 6 Director Paul Ledesma pag-abot sa problema sa illegal nga druga. Suno kay Villanueva, nagapasa siya kada bulan sang report may kaangtanan sa illegal drug activities sa iya barangay pero wala man sang ginahimo ang PDEA. Aminado ini nga seryoso ang problema sa illegal drugs sa iya lugar sa diin naga-estar ang gin-alegar drug personality nga si alyas Apa.

Manilag naman si Punong Barangay Remia Gregory sang Bakhaw, Mandurriao sa problema sa illegal nga druga sa iya barangay. Ssuno kay Gregory, nagadaigon man sila kun gab-i kabangdanan siya mismo ang manilag. Pero iya ginpasiguro nga ginasaway niya ang mga durugista sa barangay. Ginpanghiwala sang kapitana nga nagabaligya sang illegal drugs ang anak sini nga si Bonnie kag hinablos nga si Arianne. Madugay naman suno sa iya nga wala sila nagkit-anay sang iya utod nga si Richard Prevendido, ang isa sa mga gintudlo ni PDEA 6 Director Ledesma nga lider sang Prevendido drug group.

Sa pihak nga bahin, nagpamalibad nga maghatag sang statement si Tanza Esperanza Punong Barangay Nene Odicta may kaangtanan sa problema sa illegal nga druga sa iya barangay. Gintuyo sang AkRyon radyo nga ma-interview ang punong barangay pero wala ini naghatag sang pahayag. Sa baylom lunsay sorry lang ang mabatian sa kapitan bangud indi ini makahatag sang statement kadungan sang panamyaw sang Merry Christmas. Si Kapitan Odicta ang utod ni Melvin Odicta alyas Boyet, ang gintudlo sang PDEA 6 nga top drug personality sa siyudad. Si Boyet Odicta man ang nagpamuno sa grupo nga nagtuyo magsaka sa Aksyon Radyo Iloilo sang Nobyembre 19 sang kaagahon. (Aine Grace Bravo)

Leave a Reply