Driver sang motorsiklo, patay matapos makasagaid sa ginasundan nga 10-wheeler truck sa Oton!

Iloilo City — Patay ang driver sang motorsiklo matapos nga makasagaid sa ginasundan nga 10-wheeler truck sa Trapiche, Oton kaina sang kaagahon.

Ginkilala ang driver kay Wilfredo Ravena Jr, 24 anyos sang Sambaludan, Oton.

Padayon naman nga ginabulong sa St Paul’s Hospital ang mga angkas ni Ravena nga sanday Wizard Ravena, Jomel Basco kag Gino Dafilmoto.

Suno sa driver sang truck nga si Leo Galino, 27-anyos sang San Roque, Barotac Viejo, nakibot ini sang gulpi nga may naglagapok kag nakita nga nagabalang-balang ang motorsiklo.

Posible suno sa iya nagsaga-id ang manibela sang motorsiklo sa kilid sang truck sang tuyo ini mag-overtake gani nadulaan sang kontrol si Ravena tubtob nga natumba sila.

Puno sang karga ang truck ni Galino nga padulong kuntani sa San Jose Antique sang natabu ang aksidente. (JoMaque)