LTFRB 6, ginhingyo ni Mayor Jed Patrick Mabilog nga indi pagdakpon ang mga drivers sang provincial PUVs nga mag-ula kag maghakut sang pasahero sa Joroshely kag Vallacar Transit Terminal
Iloilo City–Ginpasiguro ni Mayor Jed Patrick Mabilog nga wala sang matabu nga dakpanay sa mga depasahero nga jeep kon magpapanaug kag magpasaka sang pasahero sa Joroshely Terminal sa Tagbak, Jaro kag sa Vallacar Transit Terminal sa Buhang, Jaro.
Sa press conference sang alkalde kahapon, ginpahayag sini nga ginpasalig siya ni LTFRB 6 Director Romulo Bernardes nga indi sila magpangdakop sa mga provincial utility jeeps bangud sa out-of-route violation. Bisan ang mga taga-TMTRO suno sa iya ang indi man magpangdakop tubtub nga ma-aprobahan ang franchise sang Tagbak Terminal sa masunod nga semana.
Ginpabutyag sang alkalde nga wala sang problema kon mag-operate ang Tagbak Terminal bisan wala na-aprobahan ang renewal sang ila frangkisa bangud wala sang intensyon ang syudad nga siraduhan ang terminal. Ginatugyan sini sa City Council ang pagdesisyon sa paghatag sang renewal of franchise sa Tagbak Terminal sa masunod nga regular session.
Sa experyensya ni Mabilog, kon wala sang problema sa first reading ang ordinance, sigurado nga maaprobahan man ini sa second kag third reading. (Aine Grace Bravo)