EA Jeffrey Celiz, ipatawag ni Mayor Jed Patrick Mabilog agud pangayuan sang pa-athag sa paguwa sang iya pangalan nga kaupod sang anak ni PDEA-identified drug personality Melvin Odicta Sr ga nag-test fire sa firing range sa syudad
Iloilo City–Ipatawag ni Mayor Jed Patrick Mabilog si Jeffrey Celiz, ang iya executive assistant for political affairs, agud pamangkuton sa naguwa nga report nga naka-upod ini kay Melvin Odicta Jr alyas Bin-Bin, anak ni PDEA 6-identified drug personality, sa pagtest-fire sa shooting range sa syudad.
Ginpasalig sang alkalde nga pahalinon sa city government si Celiz kon mapamatud-an nga may illegal ini nga ginahimo. Dapat nga i-limit suno sa iya ni Celiz sa political affairs ang iya functions. Gin-ako ni Mabilog nga indi niya mabantayan ang tanan nga hulag ni Celiz pero kumpiyansa siya nga responsable ini nga empleyado sang gobierno.
Magluwas kay Celiz, namitlangan man nga kaupod ni Odicta Jr sa firing range ang pila ka police officers nga sanday Lino Duarte, VC Amatril, Romeo Hualde, Joey Rodellado kag Ric Poblador kag isa ka Edmund Defensor. Naguwa ang impormasyon sa Senate Inquiry sang Martes angut sa tuyo nga pagsaka sang grupo ni Odicta Sr sa estasyunan sang Aksyon Radyo Iloilo sang nagligad nga tuig.
“Malisyoso”
Gintawag naman ni Celiz nga unfair ang pagdalahig sang iya pangalan nga naga-upod upod kay Odicta Jr. Ginakabig ni Celiz nga malisyoso ang paglakip sang iya sa isyu nga wala sang kamatuoran.
Suno kay Celiz, isahanon siya nga nagkadtu sa shooting range matapos gintawgan sang tag-iya nga nag-abot na ang gin-order niya nga caliber 40. Normal lang suno sa iya nga magpirma siya sa logbook bilang regulasyon sang mga nagasulod sa shooting range. Gin-athag naman ni Celiz nga lisensyado ang pusil kag gin-order niya ini agud gamiton bilang proteksyon sa kaugalingon kag sa iya pamilya.
Gin-ako naman ni Celiz nga kilala niya si Odicta Jr kag bisan si Duarte. Suno kay Celiz, madugay na niya nga kilala si Odicta Jr pati na si Odicta Sr bangud sa Tanza siya naga-istar.
Gin-athag pa ni Celiz nga nagadangup siya sadtu kay Duarte bangud sang nabaton niya nga pamahog halin kay Councilor Plaridel Nava angut sa away sa pulitika. (Aine Grace Bravo)